Korçë/ 37-vjeçari plagos me mjet prerës djalin e bashkëjetueses, kapet pas arratisjes
Një 18-vjeçar është plagosur në kokë me mjet prerës mbrëmjen e sotme në Korçë, pas një konflikti me njerkun e tij.
Ngjarja ka ndodhur rreth orës 21:55. I riu me inicialet A. S. është paraqitur i dëmtuar në spital, ku po merr ndihmë mjekësore.
Sipas të dhënave paraprake, ai është plagosur gjatë një konflikti për motive të dobëta me njerkun e tij, shtetasin Niko Baka, 37 vjeç.
Pas ngjarjes, autori i dyshuar është larguar nga vendi i konfliktit, por është lokalizuar dhe kapur në një kohë të shkurtër nga shërbimet e Policisë.
37-vjeçari është shoqëruar në Komisariatin e Policisë për veprime të mëtejshme procedurale, ndërsa grupi hetimor, nën drejtimin e Prokurorisë, po punon për zbardhjen e plotë të rrethanave të ngjarjes.
