Dorëheqja e drejtorit të Policisë, Gazmend Hoxha, nuk e ka ulur presionin mbi Qeverinë Kurti. Të tri partitë kryesore opozitare kërkojnë tani që përgjegjësinë politike për vrasjen e Arlinda Zekajt ta marrin ministrja e Drejtësisë, Donika Gërvalla, dhe ministri i Brendshëm, Xhelal Sveçla.
Deputetja e PDK-së Besa Kabashi-Ramaj tha të premten në një konferencë për media se drejtori i Policisë s’mund të bëhet “kurban” për ministrat. Ajo përmendi gjetjet e Inspektoratit Policor: një urdhër mbrojtjeje nuk u zbatua, një tjetër u zbatua me vonesë dhe kërkesa për rivlerësimin e rrezikut u injorua. Nëse ministrat nuk japin dorëheqje, i kërkoi Kabashi-Ramaj kryeministrit Kurti, ai duhet t’ua kërkojë largimin ose t’i shkarkojë vetë.
Avni Arifi nga AAK-ja e quajti “të poshtër” konferencën e përbashkët të dy ministrave. Sipas tij, dorëheqja “morale” e drejtorit nuk mjafton, dhe Aleanca mbështet protestën e grave në Prishtinë. Nga LDK-ja, deputeti Avdullah Hoti shkroi në Facebook: “Llogaridhënia nuk është raport. Është dorëheqje.”
Në konferencën e së premtes, Gërvalla dhe Sveçla e refuzuan dorëheqjen, me arsyetimin se nuk është çasti. Gërvalla pranoi se dokumentacioni tregon se vrasja me shumë gjasë mund të ishte parandaluar. Ajo përmendi vonesat institucionale nga 10 korriku deri më 25 tetor. Sveçla renditi shkeljet e Policisë, ndër të cilat moszbatimin e urdhrit të parë të mbrojtjes dhe vonesën në zbatimin e të dytit.
Deri tani janë pezulluar 11 zyrtarë policorë, kryeprokurorja e Pejës dhe prokurorja e rastit. Kurti e ka pranuar dorëheqjen e Hoxhës dhe ka emëruar Fehmi Hotin ushtrues detyre.
Organizatoret e protestave thonë se do të dalin në rrugë çdo ditë derisa të largohen dy ministrat. Protestat janë shtrirë tashmë në Pejë dhe Mitrovicë, dhe një tjetër është paralajmëruar për sot në Prishtinë.
