23.09.2026 – 21:37
“Liria është edhe përgjegjësi” – mesazhi i Hazirit në natën e tetë të protestës
Organizatori i protestës “Jo në emrin tim”, Çlirim Haziri, u ka bërë thirrje institucioneve të Kosovës që të veprojnë sa më shpejt ndaj kërkesave të protestuesve, duke paralajmëruar se “durimi po përfundon”.
Duke folur në natën e tetë të protestës në sheshin “Skënderbeu” në Prishtinë, Haziri kërkoi trajtimin dhe votimin e Projektligjit për ndryshimin dhe plotësimin e Ligjit për Dhomat e Specializuara, si dhe mbështetje financiare për mbrojtjen e ish-krerëve të UÇK-së.
“Mosveprimi i institucioneve nuk mund të zgjasë pafund. Sepse ne nuk e durojmë padrejtësinë. Populli nuk e duron heshtjen. Pritjes sonë po i vjen fundi. Durimi ynë po përfundon. Nga ky shesh u themi institucioneve: Veproni sa më shpejt! Mos e ngatërroni qetësinë tonë të deritanishme me dobësi!”, deklaroi Haziri.
Ai tha se protestuesit do të vazhdojnë të mblidhen derisa kërkesat e tyre të marrin përgjigje.
“Dikush ka menduar se do të dilnim një natë. Dikush ka menduar se pas dy-tri netësh do të lodheshim. Dikush ka pritur që ky shesh të zbrazej. Por le ta shohin këtë shesh sonte! Jemi ende këtu!”, tha ai.
Haziri falënderoi qytetarët për pjesëmarrjen gjatë tetë netëve të protestës, duke thënë se tubimet janë shprehje e mbështetjes për UÇK-në dhe kundërshtimit ndaj asaj që protestuesit e konsiderojnë padrejtësi nga Dhomat e Specializuara.
“Çdo natë populli erdhi në shesh, sepse UÇK-ja është e popullit dhe populli është i UÇK-së”, u shpreh ai.
Në një pjesë të fjalimit, Haziri përmendi edhe familjet e Hashim Thaçit, Kadri Veselit, Rexhep Selimit dhe Jakup Krasniqit, duke thënë se protestuesit po solidarizohen me mungesën e tyre nga familjet.
“Hashimi sonte nuk kthehet në shtëpi. Kadriu sonte nuk kthehet në shtëpi. Rexha sonte nuk kthehet në shtëpi. Jakupi sonte nuk kthehet në shtëpi”, tha Haziri.
Ai shtoi se “liria është edhe përgjegjësi”, duke u bërë thirrje qytetarëve të mos heshtin dhe të vazhdojnë mbështetjen për ish-krerët e UÇK-së dhe familjet e tyre.
“Ndoshta sonte nuk na dëgjoni. Por dijeni: Kosova nuk ju ka harruar! Populli juaj është këtu! Fëmijët tuaj nuk janë vetëm! Familjet tuaja nuk janë vetëm!”, u shpreh Haziri.
Në fund, organizatori i protestës bëri thirrje për pjesëmarrje edhe më të madhe në ditët në vijim.
“Nesër duhet të jemi më shumë! Pasnesër edhe më shumë! Derisa kërkesat tona të marrin përgjigje!”, tha ai, duke e përmbyllur fjalimin me thirrjen “Jo në emrin tim!”.
23.09.2026 – 21:34
“Jo në emrin tim”, nata e tetë e protestës në Prishtinë kundër aktgjykimit të Speciales
Për të tetën natë me radhë, qytetarë janë mbledhur sërish në sheshin “Skënderbeu” në Prishtinë për të protestuar kundër vendimit dënues të Gjykatës Speciale ndaj ish-krerëve të Ushtrisë Çlirimtare të Kosovës (UÇK).
Këngëtari Ylli Limani është mysafir i mbrëmjes në natën e tetë të protestës “Jo në emrin tim”.
Para protestuesve do të flasin këngëtarja Leonora Jakupi dhe gazetari e veterani i luftës çlirimtare, Resul Sinani.
Protesta kundërshton vendimin e Gjykatës Speciale në Hagë ndaj ish-krerëve të UÇK-së.
Tash e një javë, protestuesit me moton “Jo në emrin tim”, po kundërshtojnë vendimin e Speciales në Hagë dhe po kërkojnë drejtësi për ish-krerët e UÇK-së, Hashim Thaçin, Jakup Krasniqin, Kadri Veselin dhe Rexhep Selimin.
Pjesëmarrësit kanë mbajtur pankarta me mbishkrimet “Jo në emrin tim” dhe “Liria ka emër”, si dhe flamuj kombëtarë e të UÇK-së.
OVL-UÇK ka paralajmëruar protesta në të gjitha qytetet e Kosovës më 25 shtator prej orës 17:00.
