Sot, më 13 tetor, në mbarë botën shënohet Dita Ndërkombëtare për Reduktimin e Rrezikut nga Katastrofat, e cila synon të rrisë ndërgjegjësimin për rëndësinë e parandalimit dhe zvogëlimit të pasojave të fatkeqësive natyrore dhe katastrofave të tjera.
Shënimi i kësaj dite ka filluar në vitin 1989, pas një thirrjeje nga Asambleja e Përgjithshme e Organizatës së Kombeve të Bashkuara (OKB), me qëllim promovimin e një kulture globale të parandalimit, përgatitjes dhe reduktimit të rrezikut nga katastrofat.
Kjo ditë synon të nxisë qeveritë, institucionet dhe qytetarët që të ndërmarrin masa për mbrojtjen e jetës së njerëzve, mjedisit dhe pasurisë nga fatkeqësitë natyrore, përfshirë tërmetet, përmbytjet, thatësirat, zjarret dhe rrëshqitjet e dheut.
Sipas OKB-së, reduktimi i rrezikut nga katastrofat kërkon investime në sistemet e paralajmërimit të hershëm, infrastrukturë të qëndrueshme, edukim dhe përgatitje të komuniteteve për përballimin e situatave emergjente.
Ndryshimet klimatike, urbanizimi i pakontrolluar dhe degradimi i mjedisit janë ndër faktorët që mund të rrisin ekspozimin dhe cenueshmërinë e popullsisë ndaj fatkeqësive.
Në këtë drejtim, rëndësi e veçantë i kushtohet bashkëpunimit ndërmjet institucioneve dhe qytetarëve, si dhe hartimit të politikave që synojnë parandalimin e rreziqeve dhe minimizimin e dëmeve.
Dita Ndërkombëtare për Reduktimin e Rrezikut nga Katastrofat shërben gjithashtu si kujtesë se investimi në parandalim dhe përgatitje mund të shpëtojë jetë dhe të zvogëlojë humbjet ekonomike e mjedisore.
Në vitin 2009, Asambleja e Përgjithshme e OKB-së vendosi që 13 tetori të shënohet zyrtarisht si Dita Ndërkombëtare për Reduktimin e Rrezikut nga Katastrofat.
