Detaje të reja janë bërë të njohura nga ngjarja tragjike në Plaka të Greqisë, ku për shkak të një shpërthimi në një ndërtesë, humbën jetën 6 persona, mes të cilëve edhe 3 shtetas shqiptar.
Sipas hetimeve nga autoritetet greke, dyshohet se rrjedhja e gazit natyror, që shkaktoi shpërthimin vdekjeprurës dhe shembjen e ndërtesës në Plaka, ka nisur nga apartamenti në katin e dytë, ku banonte një çift i moshuar, i cili humbi jetën.
Mediat greke raportojnë se kontrollet në rrjetin qendror të furnizimit me gaz nuk kanë evidentuar asnjë rrjedhje, por ashtu, edhe pas verifikimeve në trotuar, rrjeti rezultoi i izoluar dhe pa probleme.
Për këtë arsye, hetuesit vlerësojnë se rrjedhja ka ndodhur brenda apartamentit, i vetmi në ndërtesë që ishte i lidhur me rrjetin e gazit. Në banesë ishin të lidhura tre pajisje, një sobë, një oxhak dhe një ngrohës uji. Megjithatë, ende nuk është përcaktuar se cila prej tyre ishte burimi i rrjedhjes.
Ndërkohë, familjarët e viktimave mbërritën të dielën në Greqi me kërkesë të autoriteteve. Ata do të japin material gjenetik për analizat e ADN-së, në kuadër të procesit të identifikimit të trupave.
Kujtojmë se nga shpërthimi dhe shembja e ndërtesës në rrugën “Lysikratous” humbën jetën shqiptarët Florinda Hoxha dhe bashkëshorti i saj, Ian Alexander Kirkpatrick, Eris Cani dhe bashkëshorti i saj, Florin Hoxha, si dhe çifti i të moshuarve, Athina Paparesku dhe Edmond Hings.
