Shiritat e hetimeve u vendosën para lokalit të natës në fshatin Runik të Skenderajt mëngjesin e së enjtes.
Kjo për shkak së këtu u vra një person e u plagosën tre të tjerë.
Por ky nuk ishte rasti i vetëm, meqë të hënën në një lokal në Klinë u vra një person.
Një vrasje ndodhi edhe të premten e 4 gushtit në një kafene në kryeqytet ku mbeti i vrarë një 39 vjeçar.
Për gjashtë ditë u kryen 3 vrasje në ambiente të lokaleve.
Për tu evituar këto raste, në Shoqatën e Gastronomëve të Kosovës thonë se bizneset duhet të kryejnë punën sipas ligjeve.
“Mund të jetë gjendja ekonomike që ka ndikuar në rritjen e kriminalitetit. Sidomos në lokale gjatë natës shumica janë të pajisur me sigurim fizik, me roje fizike. Kompanitë duhet ta kryejnë punën në përputhje me ligjin. Nëse je i licencum dhe i certifikun është vepër penale nëse lejon persona me armë të rrezikshme. bizneset duhet ta kryejnë punën sipas ligjit dhe të mos lejojnë persona të tillë brenda lokaleve. Mund të dëmtohemi. Pas rastit të fundit në lokalin më të famshëm të Prishtinës u vrejt të shtunën një hezitim për të dalë në kafiteri njerëzit. policia duhet ta kryejë inspektimin dhe këta persona të marrin dënime meritore”, thotë ai.
Por Anton Nrecaj vlerëson që këto vrasje po ndodhin pasi edhe ata që kanë probleme me ligjin futen në lokale pa asnjë lloj pengese.
“Kohëve të fundit kemi parë vrasje shumë të rënda, dhe është shqetësim shumë i madh sepse në popullatë ka një numër të madh të armëve pa leje. përgjegjësia bie mbi organet e sigurisë. Shumica e këtyre personave që po bëjnë vepra kriminale kanë të kaluar kriminale. Asnjëra nga institucionet nuk është marrë me pjesën e hetimit se nga vijnë këto armë pa leje. Krimet që po ndodhin në lokale të mbyllura është pjesë e asaj që këto lokale kanë aktivitete kriminale. Të gjithë këta njerëz që kanë probleme me ligjin futen në lokal pa asnjë lloj pengese. Përderisa organet e sigurisë kanë dijeni se në cilat lokale mund të futën persona të armatosur me armë zjarri që mund të shkaktojnë aksidente me fatalitet duhet të ndërhyjnë organet e drejtësisë. Një pjesë e të rinjve janë të pajisur me armë pa leje. Drejtësia ka dështuar rreth këtyre proceseve”, thotë Ndrecaj.
E sociologu, Genc Xërxa thotë se këto krime po ndodhin për shkak që numri i individëve që mbajnë armë në shoqërinë tonë është i madh.
“Shfaqja e dhunës dhe krimeve ditëve të fundit është indikator mjaft i keq për sigurinë publike në shoqërinë tonë. Duhet të rishikohet ligji sepse numër i sasive të armëve brenda shoqërisë është indikacion që mund të shpërfaqë krimin. Imazhet shumta në media, filmave të dhunës në mënyrë të pavetëdijshme mund të infiltrohen në trurin e njerëzve. Duhet rishikim i armëve të zjarrit, të rishikohet ligji të reduktohet armëmbajtja mes individëve”, tha Xërxa.
Ndërkohë ndër vite, Policia e Kosovës llogaritet që konfiskon rreth 1200 deri në 1500 armë të ndryshme ilegale.
