Presidenti amerikan Donald Trump ndërroi fshehurazi aeroplanë ndërsa po largohej nga një samit i NATO-s në Turqi muajin e kaluar, si pjesë e një dredhie të përpunuar në përgjigje të një kërcënimi të mundshëm iranian, raportojnë mediat amerikane.
Presidenti amerikan hipi në Air Force One në sy të kamerave televizive përpara se të transportohej në një avion ushtarak me ndihmën e një kamioni ushqimor, tha Washington Post. Gazetarët dhe disa anëtarë të stafit të Shtëpisë së Bardhë në bord nuk e dinin se ai ishte nxjerrë jashtë shtetit.
Zyrtarët i thanë partnerit amerikan të BBC-së, CBS News, se SHBA-të kishin zbuluar një kërcënim të besueshëm iranian për të qëlluar një raketë drejt aeroplanit. Shtëpia e Bardhë nuk e ka konfirmuar ndërrimin sekret.
Trump kishte thënë më parë se ai ishte “objektivi numër një” i Iranit gjatë samitit në Ankara.
Manovra klandestine erdhi një ditë pasi SHBA-të rifilluan sulmet ushtarake ndaj Iranit pas një dështimi të negociatave midis Uashingtonit dhe Teheranit për t’i dhënë fund luftës.
Trump kishte mbërritur në Turqi me një Boeing 747-8 më të ri të dhuruar nga Katari , por njoftoi se do të nisej me Air Force One të vjetër “për hir të kohërave të vjetra”.
Më 8 korrik, pamjet e filmuara e tregonin atë duke hipur në avionin presidencial në aeroportin e Ankarasë. Por sipas Washington Post, ai u dërgua fshehurazi në një avion ushtarak më të vogël C-32A – një Boeing 757 i modifikuar që përdoret shpesh nga zëvendëspresidenti – nëpërmjet një kamioni ushqimi i cili ishte ngritur në nivelin e avionit në anën e kundërt me atë ku ai kishte hipur.
Sekretari i Mbrojtjes Pete Hegseth hipi në C-32A veçmas duke përdorur shkallët e jashtme në një përpjekje për ta bërë fluturimin të dukej normal, sipas gazetës.
