Kopredesuesja e Partisë së Gjelbër Evropiane, Vula Ceci, ka deklaruar se është në favor të ngrirjes së fondeve të Bashkimit Evropian për Serbinë, me qëllim që, sipas saj, Evropa të dërgojë një mesazh të qartë se ndaj presidentit serb Aleksandar Vuçiq nuk mund të vazhdohet si më parë.
Ajo tha se Serbia po shënon regres në shumë fusha dhe se besimi ndaj Vuçiqit në Bruksel është i humbur, duke shtuar se zgjedhjet do të ndodhin në një moment dhe opozita duhet të jetë e përgatitur.
Ceci theksoi se ka ardhur sërish në Serbi së bashku me delegacionin e Partisë së Gjelbër Evropiane, ku përveç takimeve me Frontin të Majtë të Gjelbër, do të takohet edhe me përfaqësues të shoqërisë civile dhe organizata të tjera.
“Ne nuk dalim shpesh jashtë Brukselit dhe fakti që jemi këtu është shumë i rëndësishëm, sepse duam të tregojmë solidaritet të plotë me Serbinë, por edhe të theksojmë se po e ndjekim nga afër situatën. Që nga shtatori i kaluar e deri sot jemi shumë të shqetësuar, sepse trendet nuk janë të mira – nga sulmet ndaj protestuesve, te dhuna policore, te ajo që po ndodh me mediat e pavarura dhe reformat në drejtësi,” tha ajo për N1.
Ajo shtoi se Komisioni Evropian po shqyrton mundësinë e pezullimit të fondeve për Serbinë nga Plani i Rritjes, ndërsa grupet politike evropiane kërkojnë deri në 1.6 miliardë euro të mos i jepen Serbisë.
Sipas saj, fondet duhet të lidhen drejtpërdrejt me reformat dhe procesin e integrimit.
“Ne mendojmë se paratë duhet të lidhen me reformat. Nëse nuk ka reforma, fondet duhet të ngrijnë. Por nuk duhet të ndëshkohet shoqëria civile. Duhet të ketë fonde të tjera për organizatat që mbështesin lirinë në Serbi,” tha ajo.
Ceci theksoi se BE nuk mund të vazhdojë të sillet me Vuçiqin si më parë dhe se mënyra e vetme për të dërguar mesazh të qartë është ngrirja e financimeve, pasi sipas saj këto fonde nuk po ndihmojnë reformat.
“Nëse duam t’i japim Serbisë perspektivë evropiane, mënyra e vetme është pa Vuçiqin,” deklaroi ajo.
Ajo gjithashtu tha se besimi ndaj presidentit serb është plotësisht i humbur dhe se premtimet e tij nuk janë përmbushur, duke përmendur situatën me mediat dhe reformat në drejtësi.
Sipas saj, Bashkimi Evropian duhet të ketë një qasje më të fortë politike dhe të sigurojë zgjedhje të lira në Serbi, me monitorim ndërkombëtar.
Ceci shtoi se opozita duhet të ketë një strategji të përbashkët dhe të mos jetë e përçarë, duke e krahasuar situatën me zhvillimet në Hungari.
Ajo theksoi se Vuçiq do të zgjedhë momentin më të përshtatshëm për shpalljen e zgjedhjeve dhe se opozita duhet të jetë e organizuar dhe e koordinuar.
