![](https://i0.wp.com/www.fiks.al/wp-content/uploads/2023/09/aksion-simbolik-para-stacionit-policor-ne-bujanoc-lutfiu-bashkesia-nderkombetare-ta-kete-vemendjen-shqiptaret-po-diskriminohen-ne-serbi_64fac13451bb2.jpeg?resize=850%2C478&ssl=1)
Kryetari i Këshillit Kombëtar të Shqiptarëve në Luginën e Preshevës, Nevzad Lutfiu ka kërkuar nga Ministria e Brendshme e Serbisë përmes një aksioni simbolik që ta respektojnë Kushtetutën për numrin e policëve nga komuniteti shqiptar.
Lutfiu përmes një postimi në rrjetin social në Facebook ka treguar që numri i policëve shqiptar është tejet i vogël si dhe shumë prej tyre janë afër pensionimit.
“Respektojeni Kushtetutën’, ishte thirrja që i bëmë sot Ministrisë së Brendshme të Serbisë.
Neni 77 i Kushtetutës së Republikës së Serbisë thotë: ‘Lidhur me punësimin në organet shtetërore, në ndërmarrjet publike, organet e krahinës, vetëqeverisjes lokale duhet të kihet parasysh përbërja nacionale dhe përfaqësimi proporcional i pakicave nacionale’. Numri i policëve shqiptarë është tejet i vogël, madje shumë prej tyre janë afër pensionit”, ka shkruar Lutfiu.
Tutje ai ka thënë se as edhe një polic nuk është i pranuar viteve të fundit nga komuniteti shqiptar.
“I bëjmë thirrje Bashkësisë Ndërkombëtare që ta kenë vëmendjen tek gjendja e shqiptarëve në Serbi, sepse diskriminimini ka prekur kufinjtë e racizmit”, ka shkruar ndër të tjera Lutfiu.