Shtëpia e Bardhë i ka kërkuar Kimberly Guilfoyle-it të japë dorëheqjen nga posti i ambasadores së SHBA-së në Greqi, pasi gazeta “The Wall Street Journal” raportoi se ajo kishte kërkuar 100,000 dollarë nga një donator i Trump-it në periudhën para seancës së saj të konfirmimit vitin e kaluar.
“I kemi kërkuar ambasadores Guilfoyle të japë dorëheqjen. Ajo ka qenë një vlerë e shtuar e mrekullueshme për ekipin dhe i urojmë gjithë të mirat,” tha të martën zëdhënësja e shtypit e Shtëpisë së Bardhë, Katie Zacharia.
Gazeta “The Journal” raportoi javën e kaluar se Guilfoyle kishte kërkuar një pagesë prej 100,000 dollarësh në llogarinë e saj “American Express” pak ditë para seancës së konfirmimit. Ndërsa kërkonte pagesën nga Eric Deters, një donator i Trump-it dhe ish-kandidat për në Kongres, Guilfoyle kishte theksuar lidhjet e saj me administratën Trump dhe ishte ofruar të lobonte pranë Shërbimit të të Ardhurave të Brendshme (IRS) dhe Departamentit të Drejtësisë në emër të tij, sipas mesazheve me tekst të shqyrtuara nga gazeta. Ajo premtoi se do të ishte mbështetëse e palëkundur e Trump-it dhe e tij, “me Trump-in deri në fund, përgjithmonë”, nëse ai siguronte paratë për “Amex”. Në fund, ai nuk e kreu pagesën, duke i thënë asaj se kjo do t’i kushtonte martesën.
Avokati i Guilfoyle-it vuri në dyshim vërtetësinë e mesazheve, por nuk pranoi të jepte detaje, duke thënë se ambasadores i “dehej një shumë” për aktivitete ku kishte marrë pjesë para emërimit të saj. Deters tha se nuk i detyrohej asaj asnjë shumë.
Në shtator, “WSJ” raportoi se Guilfoyle kishte krijuar habi te zyrtarët qeveritarë në mbarë Evropën Juglindore me promovimin e saj këmbëngulës të një kompanie greke dhe përpjekjet e gjera për të përfshirë një nga lobistët e saj, Christos Marafatsos. Marafatsos merrte pjesë në takime në rezidencën e ambasadores dhe me zyrtarë të huaj, dhe disa zyrtarë e ngatërronin atë me shefin e saj të kabinetit.
Kjo seri zbulimesh kishte shkaktuar pakënaqësi te zyrtarët e administratës në Uashington, shumë prej të cilëve ishin tashmë skeptikë lidhur me mandatin e Guilfoyle-it si ambasadore. Që nga mbërritja në Athinë vjeshtën e kaluar, ish-e fejuara e Donald Trump Jr. i alternonte takimet me liderët rajonalë me vizita në sfilata mode dhe gala arti në Evropë. Stilistja e saj, Fancy James, shpesh e shoqëronte në udhëtime, duke marrë pjesë edhe në një darkë me zyrtarë grekë dhe bullgarë në Uashington në fillim të këtij viti.
I pyetur të hënën nëse mund ta shkarkonte Guilfoyle-n, Presidenti Trump u tha gazetarëve: “Epo, po e shqyrtojmë çështjen. Po, nuk jemi të kënaqur.”
