![](https://i0.wp.com/www.fiks.al/wp-content/uploads/2023/07/azemi-i-ldk-se-per-nagip-krasniqin-vvja-i-ka-dale-ne-mbrojtje-po-pengon-zbardhjen-e-pazareve-me-energjine-elektrike_64b80b8d50e9a.png?resize=750%2C375&ssl=1)
Kryetari i degës së LDK-së në Ferizaj, Visar Azemi ka reaguar pasi që kryeshefit të KEK-ut, Nagip Krasniqi i është vazhduar masa e paraburgimit edhe për dy muaj nga Gjykata Themelore në Prishtinë.
Azemi përmes një postimi ka thënë se nga dita e arrestimit, Qeveria e VV-së i ka dalë në mbrojtje Krasniqit, madje Azemi ka përmendur edhe shkarkimin brenda PK-së, duke thënë se krejt kjo është bërë për të penguar zbardhjen e pazareve me energjinë elektrike.
“Kryeshefi i KEK-ut Nagip Krasniqi është arrestuar me 19 prill. Gjykata Themelore në Prishtinë sot ka aprovuar kërkesën e Prokurorisë Speciale për vazhdim të masës së paraburgimit ndaj tij edhe për dy muaj. Sado që skandalet e kësaj qeverie mbulojnë njëra-tjetrën, kujtojmë që njeriu i partisë në pushtet, Nagip Krasniqi, që nga ta u instalua në këtë ndërmarrje, dyshohet për korrupsion. Që nga dita e arrestimit të tij, i madh e vogël në Qeveri e VV i kanë dalë në mbrojtje. Pati edhe një shkarkim brenda Policisë nga njësiti që po hetonte Krasniqin. Krejt kjo për ta penguar zbardhjen e pazareve me energjinë elektrike. Për ta mirëmbajtur rrjetin e mafisë energjetike, në krye të së cilit qëndron Martin Berishaj.” – ka shkruar ai.
Azemi i LDK-së tutje ka uruar që drejtësia të mos dorëzohet dhe le të dalë e vërteta e Krasniqit dhe Martin Berishajt.
“Uroj që drejtësia të mos dorëzohet dhe t’i shkojë deri në fund këtij hetimi. Le të dalë e vërteta e Nagip Krasniqit dhe Martin Berishajt, e rrjedhimisht edhe e Albin Kurtit.” – ka përfunduar ai.