Një ngjarje e rëndë ka tronditur qytetin e Plant City në Florida të SHBA-së, ku një 34-vjeçar dyshohet se ka vrarë bashkëshorten dhe tre fëmijët e tyre të mitur, përpara se t’i jepte fund jetës.
Tragjedia ndodhi të enjten pasdite në shtëpinë ku familja jetonte prej rreth një viti. Sipas autoriteteve, policia u njoftua përmes një telefonate të hapur në numrin emergjent 911, pak para orës 15:30.
Kur mbërritën në vendngjarje, rreth 10 minuta më vonë, zyrtarët gjetën të vdekur 34-vjeçaren Raquel, tre fëmijët e çiftit, të moshës 5, 3 dhe 1 vjeç, si dhe bashkëshortin e saj, Isaac Luechtefeld, 34 vjeç, i cili punonte si mekanik.
Sherifi Chad Chronister e cilësoi rastin si një tragjedi të rëndë, ndërsa bëri të ditur se familja nuk kishte pasur histori të mëparshme kriminale dhe se policia nuk ishte thirrur asnjëherë në atë adresë.
Familjarët thanë se nuk kishin vërejtur shenja që mund të paralajmëronin për ngjarjen. Motra e Raquel tregoi se çifti kishte dalë në një darkë romantike të hënën dhe se, sipas saj, gjithçka dukej normale. Edhe nëna e Isaac u shpreh se lajmi ishte tronditës dhe se nuk kishte parë asnjë shenjë që mund të paralajmëronte një tragjedi të tillë.
Autoritetet po vazhdojnë hetimet për të zbardhur rrethanat dhe motivin e ngjarjes.
