Takimi i parë i Komitetit Strategjik Politik dhe të Mbrojtjes, i themeluar në bazë të Marrëveshjes së Përbashkët të Mbrojtjes së Mekës, filloi të hënën në Stamboll.
Turqia po pret takimin inaugurues të komitetit, i cili u krijua për të ofruar drejtim strategjik për aktivitetet sipas marrëveshjes dhe që mbledh së bashku ministrat e jashtëm, ministrat e mbrojtjes dhe shefat e shtabeve të përgjithshme të Turqisë, Pakistanit dhe Arabisë Saudite.
Pas një fotoje familjare, takimi nisi me pjesëmarrjen e ministrave të jashtëm e të mbrojtjes dhe shefave të shtabeve të përgjithshme të Turqisë, Pakistanit dhe Arabisë Saudite.
Pjesëmarrësit pritet të diskutojnë çështje të sigurisë ndërkombëtare, zhvillimin e aftësive mbrojtëse, promovimin e ndërveprimit midis forcave të armatosura të tre vendeve, thellimin e bashkëpunimit në industrinë e mbrojtjes, duke përfshirë prodhimin dhe kërkimin e zhvillimin e përbashkët, si dhe forcimin e përpjekjeve të përbashkëta për të luftuar terrorizmin.
Takimi pritet gjithashtu të përcaktojë kornizën për Sekretariatin dhe mekanizmat e tjerë përkatës që do të koordinojnë punën në fushat e identifikuara nga Komiteti Strategjik Politik dhe i Mbrojtjes, si dhe të përcaktojë një plan veprimi për hapat e ardhshëm, shkruan Anadolu.
Pritet që takimi të riafirmojë se Marrëveshja e Përbashkët e Mbrojtjes e Mekës, që synon forcimin e sigurisë, paqes dhe stabilitetit në rajon, ofron mundësi për vendet që miratojnë një qasje bashkëpunuese ndaj sigurisë dhe i japin përparësi paqes dhe prosperitetit mbi konfliktin.
Presidenti turk Rexhep Tajip Erdogan, Princi i Kurorës Saudite Mohammed bin Salman dhe kryeministri pakistanez Shehbaz Sharif nënshkruan Marrëveshjen e Mbrojtjes së Përbashkët të Mekës në Mekë më 7 gusht.
Marrëveshja përcakton që një sulm kundër njërit prej shteteve nënshkruese do të konsiderohet si sulm kundër të gjitha palëve.
Gjithashtu synon të nxisë një kulturë të re të bashkëpunimit rajonal dhe mbetet e hapur për pjesëmarrjen e aktorëve që respektojnë të drejtën ndërkombëtare dhe ndajnë një vizion të bashkëpunimit paqësor.
