Numri i lartë i aksidenteve rrugore afro 12 çdo ditë kërkon masa të reja menaxhimi pasi në sezonin veror tendenca është në rritje.
Sipas kreut të urgjencës kombëtare përveç aksidenteve me makina këtë vit ka një rritje të aksidenteve me motor.
Kreu i urgjencës kombëtare ka iniciuar një studim për oraret e fluksit të aksidenteve. Skënder Brataj thotë se rezulton ora 12:00- 15:00 me më shumë aksidente, më pas fasha deri në orën 17:00.
Si masë parandalimi Brataj kërkon bashkëpunim ndërmjet institucioneve për të parandaluar aksidentet. “Patrulla të qëndrojë në dalje të lokaleve ku dihet që konsumohet alkool pasi po doli e bëri 50 km në gjendje të dehur e ka kryer aksidentin”, shprehet Brataj.
Skënder Brataj kërkon vëmendje dhe kontroll të shtuar në ato zona bregdetare dhe jo vetëm ku po organizohen festat e qyteteve ku të rinjtë konsumojnë alkool dhe substanca narkotike e më pas përdorin automjetet për t’u kthyer në banesat e tyre duke u bërë kërcënim serioz për sigurinë në rrugë dhe burim aksidenti.
