Dje një grup të rinjsh protestuan para SPAK me pankarta në duar duke i kujtuar për dosjet e korrupsionit që ende nuk kanë marrë drejtësi. Kanë kaluar rreth tetë muaj nga ndryshimi në drejtimin e Prokurorisë së Posaçme Kundër Korrupsionit dhe Krimit të Organizuar, por disa prej dosjeve më të bujshme që kanë kaluar në tryezën e SPAK vijojnë të jenë ende të hapura.
Klodian Braho mori drejtimin e institucionit në dhjetor të vitit 2025, duke trashëguar nga Altin Dumani një sërë hetimesh të ndjeshme që lidhen me politikanë, zyrtarë të lartë, oligarkë, kontrata publike, prona, pastrim parash, korrupsion dhe ngjarje të rënda kriminale. Në këta muaj, pritshmëria për një përshpejtim të hetimeve ka qenë e lartë, sidomos për çështjet që prej vitesh ndodhen në faza hetimore.
Megjithatë, një pjesë e dosjeve vijojnë të mbeten të hapura, ndërsa për disa prej tyre ende nuk ka një përfundim penal që të përcaktojë përgjegjësitë. Në këtë panoramë, SPAK përballet me një prej sfidave më të mëdha të viteve të fundit, të tregojë nëse hetimet për dosjet më të ndjeshme do të çojnë në përgjegjësi konkrete apo do të vazhdojnë të zvarriten për shkak të kompleksitetit të tyre.
“McGonigal”, dosja që vijon të mbetet në vëmendje
Një prej çështjeve më të ndjeshme është ajo e njohur si “McGonigal”, e cila ka një dimension ndërkombëtar dhe ka ngritur prej kohësh pikëpyetje mbi marrëdhëniet politike dhe institucionale në Shqipëri. Edhe pse një pjesë e rëndësishme e çështjes është trajtuar nga autoritetet amerikane, në Shqipëri pritshmëria ka qenë që SPAK të sqarojë çdo rol, kontakt apo lidhje që mund të ketë pasur në territorin shqiptar. Dosja mbetet një nga çështjet që vë në provë aftësinë e SPAK për të hetuar deri në fund një çështje ku përfshihet vetë kryeministri Edi Rama. Kalimi i muajve pa një përfundim të plotë e mban këtë dosje në listën e çështjeve që vijojnë të presin përgjigje.
NEWS “Balluku, çështje e mbyllur”- Rama: Kërkesa e SPAK për arrestim, një kuturisje! Nuk bëhet fjalë për korrupsion, por hetimet të vazhdojnëPërgjimet “SKY ECC”, informacioni që rëndon mbi zyrtarët
Një tjetër prej dosjeve më të nxehta lidhet me materialet e përgjimeve “SKY ECC”, të cilat kanë mbërritur në duart e autoriteteve shqiptare përmes bashkëpunimit ndërkombëtar. Nga këto materiale janë zbuluar dhe vijojnë të hetohen lidhje mes personave të botës së krimit, biznesmenëve, ndërsa hetimet kanë prekur edhe figura të rëndësishme të politikës dhe administratës. Për SPAK, kjo përbën një prej burimeve më të rëndësishme të informacionit për zbardhjen e skemave të korrupsionit dhe lidhjeve mes krimit të organizuar dhe pushtetit. Megjithatë, edhe këtu një pjesë e hetimeve vijojnë të jenë të hapura dhe pritet të shihet se deri ku do të shkojë përgjegjësia penale për personat e përfshirë.
21 Janari, dosja që ende kërkon përgjigje
Një tjetër dosje që vijon të mbetet e hapur është ajo e 21 Janarit. Rihapja e hetimeve dhe pretendimet për prova të reja kanë rikthyer vëmendjen mbi ngjarjen e rëndë, e cila prej më shumë se një dekade ka mbetur një prej çështjeve më të debatueshme të drejtësisë shqiptare. SPAK ka pasur përballë një dosje jashtëzakonisht të ndërlikuar, ku përgjegjësitë individuale, zinxhiri institucional dhe provat e reja kërkojnë një analizë të thelluar. Edhe në gusht të vitit 2026, kjo çështje vijon të jetë në fokus, ndërsa pritshmëritë për një rezultat përfundimtar mbeten të larta.
NEWS Dyshohet se u rrëzua nga banesa e tij, humb jetën burri në Jalë/ Tronditëse edhe në Himarë, 28-vjeçarja konsumon medikamentetPPP-të në shëndetësi, hetime që vijojnë prej vitesh
Në tryezën e SPAK vijojnë gjithashtu çështjet që lidhen me koncesionet dhe partneritetet publike-private në sektorin e shëndetësisë. Laboratorët, check-up-i dhe hemodializa janë ndër kontratat që kanë prodhuar prej vitesh debate politike, raporte kritike dhe dyshime për mënyrën se si janë ndërtuar dhe zbatuar marrëveshjet me shtetin. Pavarësisht kohës së kaluar, këto çështje ende nuk kanë prodhuar një përfundim të plotë penal për të gjitha përgjegjësitë e mundshme. Pikërisht për këtë arsye, këto hetime mbeten një test për SPAK-un dhe për mënyrën se si institucioni trajton çështjet ku përballë tij janë interesa të mëdha ekonomike.
Balluku dhe dosjet e infrastrukturës e energjisë
Në të njëjtën kategori janë edhe hetimet që lidhen me sektorin e infrastrukturës dhe energjisë, ku emri i Belinda Ballukut është përmendur në disa prej çështjeve të ndjekura nga SPAK. Rruga Thumanë-Kashar, çështjet që lidhen me energjinë, Aeroporti i Vlorës, çështja e dy TEC-eve lundruese (“Tigrat e Vlorës”) apo Bankers, janë pjesë e një panorame të gjerë hetimore ku prokurorët po shqyrtojnë kontrata, procedura, vendimmarrje dhe marrëdhënie financiare. Kompleksiteti i këtyre dosjeve lidhet edhe me volumin e dokumentacionit dhe vlerat e larta financiare që janë në lojë. Por pikërisht për shkak të peshës që kanë këto çështje, çdo vonesë në hetime ushqen pyetjen nëse ato do të përfundojnë me përgjegjësi konkrete apo do të mbeten për një kohë të gjatë në fazën e hetimit.
Frida Krifca dhe fondet për fermerët
Një tjetër hetim që vijon prej vitesh është ai ndaj ish-ministres së Bujqësisë, Frida Krifca. SPAK ka deklaruar se çështja ndodhet ende në fazën paraprake, ndërsa hetimi lidhet me dyshimet për abuzime me fondet e fermerëve. Në këtë çështje është përfshirë edhe kallëzimi i OLAF ndaj ish-drejtoreshës së AZHBR-së, ndërsa mënyra se si do të ecë përpara hetimi pritet të ketë rëndësi edhe në raport me procesin e integrimit europian dhe kapitullin për bujqësinë. Fakti që hetimi vijon pas disa vitesh e bën këtë një tjetër prej dosjeve që do të kërkojë një përgjigje konkrete nga SPAK.
NEWS Tragjedi në Gjermani: Kamioni përplas për vdekje 29-vjeçaren dhe djalin e saj 3-vjeçarInceneratori i Tiranës, përgjegjësitë që ende kërkojnë përgjigje
Dosja e inceneratorit të Tiranës mbetet gjithashtu një prej çështjeve më të bujshme të drejtësisë shqiptare. Hetimi ka avancuar në disa drejtime, por ende mbetet pyetja se deri ku do të shkojë përgjegjësia dhe nëse përtej personave të përfshirë drejtpërdrejt në skemat financiare do të ketë përgjegjësi edhe në nivele të tjera politike dhe institucionale. Për vite me radhë, kjo çështje është kthyer në simbol të debatit mbi përdorimin e fondeve publike dhe mënyrën se si janë lidhur kontratat për menaxhimin e mbetjeve. Edhe sot, dosja mbetet larg një përgjigjeje që të mbyllë të gjitha pikëpyetjet e ngritura.
Dosjet e pronave të ushtrisë
Një tjetër bllok hetimesh lidhet me pronat e ushtrisë. SPAK ka vijuar hetimet për çështje që lidhen me pasuritë dhe procedurat për tjetërsimin apo përdorimin e pronave shtetërore. Bëhet fjalë për dosje që kërkojnë verifikime të shumta dokumentare, gjurmim të transaksioneve dhe përcaktim të përgjegjësive të zyrtarëve që kanë marrë vendime ndër vite. Edhe këto hetime vijojnë të jenë pjesë e dosjeve të hapura të SPAK dhe pritet të shihet nëse do të çojnë në masa konkrete ndaj personave përgjegjës.
