Pas disa ditësh negociatash dhe takimesh mes Albin Kurtit dhe Lumir Abdixhikut, VV dhe LDK kanë arritur marrëveshje për emrin që synojnë ta çojnë drejt Presidencës së Kosovës.
Bekim Sejdiu, ish-gjyqtar i Gjykatës Kushtetuese, diplomat dhe profesor universitar, është emri për të cilin dy subjektet janë pajtuar pas diskutimeve për gjetjen e një kandidati të përbashkët.
Marrëveshja e ndryshon tashmë fazën e procesit. Deri dje, Sejdiu ishte një emër që përmendej në kuadër të negociatave; sot, fokusi zhvendoset te sigurimi i votave dhe te mënyra se si kandidatura e tij do të kalojë në Kuvend.
Pse Sejdiu?
Zgjedhja e tij duket se lidhet pikërisht me profilin institucional dhe mungesën e një identifikimi të fortë me politikën aktive partiake.
Në karrierën e tij, Sejdiu ka kaluar nga diplomacia te Gjykata Kushtetuese dhe akademia. Ai ishte ndër diplomatët e parë të Kosovës, shërbeu si ambasador në Turqi dhe konsull i përgjithshëm në Nju Jork, ndërsa nga viti 2015 deri më 2021 ishte gjyqtar i Gjykatës Kushtetuese.
Ky profil i jep atij një avantazh të dukshëm në një proces ku VV dhe LDK kishin nevojë për një emër që të mos perceptohej si kandidat tipik partiak.
Nga kompromisi politik te prova e votave
Megjithatë, marrëveshja mes dy partive nuk e përfundon procesin.
Sfida e radhës është Kuvendi.
Në dy rundet e para, për zgjedhjen e Presidentit kërkohen 80 vota, ndërsa në rundin e tretë kandidati mund të zgjidhet me 61 vota, me kusht që të plotësohen kërkesat kushtetuese për zhvillimin e procesit.
Kështu, edhe pse VV dhe LDK tashmë e kanë gjetur emrin e përbashkët, mbetet të shihet se si do të pozicionohen partitë dhe deputetët e tjerë.
Nga emër i përfolur në kandidat të marrëveshjes
Vetëm një ditë më parë, emri i Bekim Sejdiut ishte ende pjesë e raportimeve dhe diskutimeve jozyrtare.
Tashmë situata është tjetër.
Marrëveshja mes Kurtit dhe Abdixhikut e vendos atë në qendër të procesit politik për zgjedhjen e kreut të shtetit dhe hap një fazë të re të negociatave: jo më për gjetjen e kandidatit, por për sigurimin e mbështetjes së nevojshme parlamentare.
Në këtë kuptim, pyetja kryesore nuk është më “Kush është Bekim Sejdiu?”, por “A i ka marrëveshja VV–LDK votat për ta bërë Bekim Sejdiun president?”
