Në mes të zhurmës mediatike dhe tensioneve që kanë shoqëruar ditët e fundit formatin “Ferma VIP”, Arbana Osmani ka zgjedhur të ndajë me ndjekësit një moment shumë personal dhe emocional.
Moderatorja e njohur ka festuar ditëlindjen e partnerit të saj, regjisorit Eduart Grishaj, duke publikuar në rrjetet sociale një dedikim të ndjerë që ka tërhequr menjëherë vëmendjen e publikut dhe mediave rozë.
Përmes llogarisë së saj në Instagram, Arbana ka publikuar një album fotografish me momente romantike dhe familjare, ku çifti shfaqet i lumtur pranë njëri-tjetrit. Mes shumë imazheve, më i komentuari ishte ai ku Arbana dhe Eduarti shihen të përqafuar buzë një liqeni, në një atmosferë të qetë dhe intime.
Krahas fotos, moderatorja kishte zgjedhur fjalë shumë domethënëse: “Gëzuar ditëlindjen qetësia ime pas çdo stuhie. Të duam pafund ❤️”.
Ndjekësit e kanë interpretuar menjëherë termin “stuhi” si një referencë të tërthortë ndaj situatave të tensionuara që kanë shpërthyer së fundmi në “Ferma VIP”, veçanërisht pas deklaratave dhe debateve të krijuara nga Fabjola Elezaj gjatë transmetimeve të fundit.
Komentet në rrjet kanë qenë të shumta, ku shumë fansa kanë parë në këtë dedikim një mënyrë elegante të Arbanës për të treguar se në mes të kritikave dhe presionit publik, mbështetja më e madhe për të mbetet partneri i saj.
Postimi i moderatores erdhi vetëm pak orë pasi Eduart Grishaj reagoi publikisht lidhur me debatet e fundit. Regjisori sqaroi përzgjedhjen e Olës në garë dhe njëkohësisht doli në mbrojtje të hapur të Arbanës, duke theksuar se reagimi i saj në studio ishte plotësisht njerëzor.
Ai shtoi se Arbana ka sjellë një frymë të re në mënyrën e prezantimit televiziv në Shqipëri dhe se puna e saj vazhdon të vlerësohet nga publiku.
