Një ngjarje e rëndë ka tronditur mëngjesin e së martës në Gjakovë, ku një burrë i moshuar është gjetur pa shenja jete në rrethana që dyshohet se lidhen me vetëvrasje.
Burime të besueshme nga strukturat e afërta me hetimin bëjnë me dije se viktima është M.P.
Sipas informacioneve, rasti ka ndodhur rreth orës 04:30 në rrugën “Adem Jashari” në Gjakovë. Një qytetar, i cili punonte në një lokal që e kishte me qira nga viktima, kishte dalë në vendin e punës për të marrë material ndërtimor. Në pjesën e pasme të lokalit ai ka vërejtur trupin e një personi të varur në litar.
I tronditur nga ajo që pa, ai ka njoftuar menjëherë Policinë dhe ekipin e Emergjencës. Vetëm më pas ka kuptuar se personi i pajetë ishte pronari i lokalit.
Në vendin e ngjarjes kanë dalë njësitë relevante policore dhe ekipi mjekësor, i cili në orën 07:20 ka konstatuar vdekjen e viktimës.
Djali i viktimës, në deklarimin e tij para hetuesve, ka bërë të ditur se babai i tij kishte ndryshuar dukshëm pas vdekjes së bashkëshortes dhe se humbja e saj kishte lënë pasoja të mëdha në gjendjen e tij emocionale dhe psikologjike.
Lidhur me rastin është njoftuar prokurori kujdestar për krime të rënda, i cili ka urdhëruar që trupi i pajetë të dërgohet në Institutin e Mjekësisë Ligjore për obduksion, me qëllim të sqarimit të plotë të shkakut të vdekjes.
Më vonë, është bërë edhe tërheqja e trupit nga ekipi i IML-së.
Hetimet për këtë rast janë në vazhdim dhe autoritetet pritet të hedhin dritë mbi të gjitha rrethanat që çuan në këtë ngjarje tragjike.
Nëse ju ose dikush që njihni po përballet me mendime vetëvrasëse apo vështirësi të rënda emocionale, kërkimi i ndihmës profesionale dhe mbështetjes nga familjarët mund të jetë vendimtar. Nuk jeni vetëm.
