Ky filmim tregon momentet kur një shqiptar ndërhyn për të ndaluar pasagjer të një avioni Uizejër, që fluturonte nga Izraeli në Angli, i cili po përpiqej të hapte derën e emergjencës në fluturim.
E përditshmja britanike “The Sun” që publikoi pamjet, shkruan se 45-vjeçari shqiptar quhet Viktor Troboloni. Ai ishte i vetmi që mori guximin të ndërhynte duke e mbërthyer për 10 minuta në dysheme pasagjerin në tentativën e tij të çmendur, teksa bërtiste “Allahu Ekber”.
Pasagjerët e tjerë dhe punonjësit e stafit të avionit morën zemër pas ndërhyrjes së shqiptarit dhe i erdhën atij në ndihmë. Ngjarja ndodhi teksa avioni fluturonte në një lartësi prej 9 200 metrash mbi sipërfaqen e tokës. Avioni bëri ulje të detyruar në Beograd ku agresori iu dorëzua autoriteteve ndërkombëtare.
“The Sun” e konsideron “heroik” gjestin e shqiptarit, banues në Zyrih, por që sipas të përditshmes britanike, udhëtonte drejt Seint Albansit në Angli për të vizituar nënën e tij të sëmurë.Tv Klan
