Ministri i Jashtëm rus, Sergey Lavrov, ka akuzuar administratën Trump se po përpiqet të “uzurpojë” ndikimin mbi tregun global të energjisë.
Objektivi i SHBA-së është të detyrojë firmat ruse të energjisë si Lukoil dhe Rosneft të dalin nga tregjet ndërkombëtare, si pjesë e një strategjie më të gjerë për të kontrolluar rrjedhat globale të energjisë, tha Lavrov.
“Shtetet e Bashkuara kanë miratuar një sërë dokumentesh doktrinare, njëri prej të cilëve shpall se SHBA-të duhet të dominojnë tregjet globale të energjisë”, tha ai në një intervistë me transmetuesin RT India, të cituar nga Al Jazeera.
“Pra, qëllimi i tyre është plotësisht i qartë: ata duan të vënë nën kontrollin e tyre çdo rrugë të rëndësishme të furnizimit me energji.”
Komentet vijnë ndërsa SHBA-të dhe Irani vazhdojnë bllokadat e tyre të ndara të Ngushticës së Hormuzit, përmes së cilës kalojnë rreth 20 përqind e burimeve energjetike të botës.
