Lugina e Drinit në Kukës është shndërruar vitet e fundit në një nga destinacionet më të preferuara të turizmit natyror, aventurës dhe vëzhgimit të peizazheve mbresëlënëse që ofron verilindja e Shqipërisë.
E rrethuar nga male madhështore dhe e përshkuar nga ujërat e Drinit, lugina tërheq vizitorë vendas e të huaj, të apasionuar pas natyrës, ecjeve në terren, lundrimit, kampingut dhe fotografisë natyrore. Zona njihet për panoramat piktoreske, biodiversitetin dhe qetësinë që ofron larg zhurmës urbane.
Kryeministri Edi Rama, në kuadër të rubrikës “Shqipëria e Bukur”, ndau sot pamje nga kjo anë e vendit, duke pasqyruar bukuritë që natyra i ka falur Luginës së Drinit.Pamjet promovojnë potencialin turistik të zonës, ku ndërthuren natyra e virgjër, trashëgimia kulturore dhe mikpritja karakteristike e banorëve të Kukësit. Lugina e Drinit po kthehet gjithnjë e më shumë në një pikë referimi për turizmin e qëndrueshëm dhe eksplorues në veri të vendit.
Po ashtu, falë rritjes së turizmit, Lugina e Drinit po shndërrohet në një qendër të agrobujtinave dhe investimeve të rëndësishme infrastrukturore, të cilat po i japin zhvillim zonës dhe po nxisin ekonominë lokale. Hapja e bizneseve të reja turistike dhe përmirësimi i infrastrukturës rrugore kanë ndikuar në rritjen e interesit të vizitorëve për këtë destinacion natyror.
