Astronomët kanë zbuluar diçka që ata e kanë quajtur një “botë aliene ujore” – një planet i mbuluar plotësisht nga oqeani.
I gjendur në sistemin diellor të një ylli rreth 100 vite-dritë larg tokës, ku 1 vit zgjat 11 ditë planeti ndodhet në të ashtuquajturën “Zona Goldilocks” ose “Zona e Banueshme”, ku temperatura e tij do të ishte e duhura për formimin e ujit të lëngshëm në sipërfaqe
Ashtu si toka, ky planet do të kishte aftësinë ta ruante ujin e lëngshëm, pasi distanca nga ‘dielli’ i tij e bën të mundur mos të jetë as shumë i nxehtë as shumë i ftohtë.
I quajtur TOI-1452 b, planeti është pak më i madh në përmasë dhe masë se toka, por për shkak të densitetit më të ulët në krahasim me tokën, shkencëtarët mendojnë se ai mund të jetë i mbuluar nga një shtresë e trashë uji.
Planetët me oqeane janë me interes të veçantë për astronomët dhe entuziastët e hapësirës, pasi mendohet se ata janë kandidatë të fortë për planetët ku jeta mund të ketë origjinën e saj fillestare apo edhe aty ku ajo mund të mbijetojë.
‘Kandidati më i mirë për planetin e oqeanit’
Astronomët që punojnë në studim e kanë quajtur TOI-1452 b një nga kandidatët më të mirë të planetit oqean të zbuluar deri më tani.
“TOI-1452 b është një nga kandidatët më të mirë për një ekzoplanet që kemi gjetur deri më sot,” tha Charles Cadieux, një student i doktoraturës në Universitin e Montrealit dhe anëtar i Institutit për Kërkime mbi Ekzoplanetët.
“Rrezja dhe masa e tij sugjerojnë një densitet shumë më të ulët se sa do të pritej për një planet që në thelb është i përbërë nga metali dhe shkëmbi, si toka”.
Një objektiv kryesor për teleskopin Webb
TOI-1452 b mendohet të jetë shkëmbor si toka, por dendësia e tij më e ulët se sa pritej, besohet të jetë për shkak të një sasie shumë më të madhe uji sesa ajo që kemi në tokë.
Ndërsa 70 % e sipërfaqes së planetit Tokë është e mbuluar me ujë, uji në fakt përbën më pak se 1% të masës së planetit tonë.
Analiza e astronomëve zbuloi se deri në 30 % e masës së TOI-1452 b mund të përbëhet nga uji.
Ky është një proporcion i ngjashëm me disa nga hënat që gjenden në Sistemin tonë Diellor, si Ganymede dhe Callisto të Jupiterit, dhe Titan dhe Enceladus të Saturnit.
Duke publikuar gjetjet e tyre në The Astronomical Journal, ekipi tashmë po planifikon studime pasuese me teleskopin më të fuqishëm në histori./Euronews/
