Një aksident rrugor është regjistruar pasditen e sotme në zonën e Vaqarri, ku dy automjete janë përplasur me njëra-tjetrën.
Sipas të dhënave paraprake, në njërin prej mjeteve ndodhej një grua shtatzënë, e cila udhëtonte së bashku me gjashtë fëmijë. Mësohet se të miturit ishin nisur për të luajtur kalçeto në momentin kur ndodhi përplasja.
Siç raporton gazetarja e Top Channel, Dorjana Bezat, si pasojë e aksidentit, disa prej fëmijëve kanë pësuar lëndime të lehta dhe kanë marrë menjëherë ndihmën e parë mjekësore në vendngjarje.
Fatmirësisht, gruaja shtatzënë ndodhet në gjendje të mirë shëndetësore dhe jashtë rrezikut për jetën. Po ashtu, nuk raportohet për persona me rrezik serioz.
Forcat e policisë kanë mbërritur në vendngjarje dhe po punojnë për të zbardhur rrethanat dhe shkaqet e sakta të aksidentit.
Njoftimi i policisë:
Tiranë/Informacion paraprak
Rreth orës 19:05, në Vaqarr, automjeti me drejtuese shtetasen Xh. Sh. është përplasur me automjetin me drejtues shtetasin A. P.
Si pasojë e aksidentit janë dëmtuar 6 fëmijë të mitur, të moshave 6-10 vjeç, të cilët udhëtonin si pasagjerë në automjetin që drejtohej nga shtetasja Xh. Sh., si dhe vetë drejtuesja e këtij automjeti. Të dëmtuarit po marrin mjekim në spital dhe ndodhen jashtë rrezikut për jetën.
Grupi hetimor po punon për sqarimin e rrethanave të aksidentit./Top Channel
