Sara Gjordeni ka reaguar publikisht pas komenteve dhe kritikave që, sipas saj, ka marrë në rrjetet sociale lidhur me mënyrën se si po rrit dhe edukon vajzën e saj, Nea.
Në një postim të gjatë, Gjordeni shprehet e revoltuar ndaj personave që komentojnë për zhvillimin e fëmijës dhe arrijnë deri aty sa të vendosin diagnoza bazuar vetëm në videot apo postimet që ajo publikon, shkruan Indeksonline.
“Kur fëmijët nuk flasin: është i sëmurë, kur fëmija është i zgjuar: është i sëmurë! Mbani opinionet tuaja për vete!”, shkruan ajo në reagimin e saj.
Gjordeni thekson se vajza e saj është një fëmijë kurioz dhe se shumë prej gjërave që mëson i zgjedh vetë. Ajo tregon se Nea ndjek prindërit nëpër shtëpi me fletore dhe ngjyra dhe kërkon të mësojë shkronjat.
“Unë nuk jam prind që e ul dhe marr një shkop në dorë për t’i mësuar me zor shkrim e lexim”, shprehet Gjordeni, duke shtuar se e sheh interesin e vajzës për të mësuar si një bekim dhe jo si problem.
Ajo ka kundërshtuar gjithashtu komentet e personave që, sipas saj, pretendojnë se fëmija nuk njeh kafshët, natyrën apo nuk kupton atë që thotë. Gjordeni argumenton se vajza ka mësuar tashmë shumë prej këtyre gjërave dhe për këtë arsye kërkon vazhdimisht të zbulojë gjëra të reja.
Në fund të reagimit, ajo paralajmëron se do të bllokojë personat që vazhdojnë të bëjnë diagnoza për vajzën dhe u bën thirrje nënave të mos lejojnë që komentet e të tjerëve të ndikojnë në mënyrën se si e shohin zhvillimin e fëmijëve të tyre.
