Drejtori i Policisë së Shtetit, Skënder Hita, ka reaguar në lidhje me helmimin e 56 studentëve të Akademisë së Policisë.
““Kjo është një situatë sensitive edhe për ne. Jemi njoftuar dje që disa prej studentëve kanë shkuar në spital për të marrë ndihmën e nevojshme mjekësore. Gjendja e tyre është paraqitur në simptoma të lehta, jo shumë të rënduara. Ne kemi marrë masat në Akademinë e Sigurisë për të gjithë studentët që ndodheshin aty. Për sa i përket veprimeve që morëm dje u arrestuam 2 prej personave përgjegjës dhe u shpall në kërkim administratorja. Bllokuam në bashkëpunim me AKU ushqimin, hetimet po vijojnë”, tha Hita.
56 studentë të Akademisë së Policisë janë paraqitur me simptoma helmimi në shërbimin infektiv, pasi dyshohet se kanë konsumuar ushqim të kontaminuar në ambientet e Akademisë.
Studentët u paraqitën në spital për ndihmë mjekësore, dhe vetëm dy prej tyre u shtruan, ndërsa pjesa tjetër u largua.
Pas ngjarjes janë marrë mostra të ushqimit për analiza laboratorike, ndërsa ka nisur hetimi epidemiologjik nga ISHP dhe AKU.
Të gjithë studentët morën ndihmën e nevojshme mjekësore dhe kanë dalë nga spitali, në gjendje të mirë shëndetësore.
Pas helmimit të 56 studentëve të Akademisë së Policisë është arrestuar teknologu dhe kuzhinieri i kompanisë katering. Po ashtu është shpallur në kërkim administratorja./TCH/
