Policia në Gjenevë përdori gaz lotsjellës dhe topa uji pasi një pjesë e protestës kryesisht paqësore kundër samitit të G7 në Evian të Francës u përshkallëzua në dhunë.
Rreth 20 mijë persona marshuan të dielën në qytetin zviceran për të kundërshtuar samitin që nis të hënën.
Protestuesit valëvitën flamuj palestinezë, mbanin pankarta për klimën dhe brohorisnin kundër kapitalizmit dhe aleancave ushtarake perëndimore.
Në pankarta shkruhej: “Jo G7-ës dhe të gjitha aleancave imperialiste” dhe “Anuloni G7-ën.”
“Jam këtu sepse nuk e pranoj që ky grup i vogël liderësh merr vendime që ndikojnë te të gjithë ne,” tha Michel, një pensionist zviceran 69-vjeçar që mbante një flamur palestinez, shkruan Al Jazeera.
Tensionet u rritën kur grupe protestuesish të veshur me të zeza u shkëputën nga marshimi, dëmtuan prona dhe dogjën automjete. Një veturë Tesla u pa duke u djegur me mbishkrimin “Hani të pasurit” të spërkatur mbi të. Policia tha se rreth 600 aktivistë të “Black Bloc” ishin përfshirë në dhunë.
Samiti pritet të fokusohet në luftën mes SHBA-së, Izraelit dhe Iranit, si dhe në luftën e Rusisë në Ukrainë.
Presidenti francez Emmanuel Macron mbërriti në Evian të dielën për të pritur presidentin amerikan Donald Trump dhe liderët e tjerë të G7, nën masa të rrepta sigurie.
