Suedia, dikur e njohur për mikpritjen e saj ndaj migrantëve, jo vetëm që ka mbyllur kufijtë e saj gjatë dekadës së fundit, por qeveria e saj e krahut të djathtë tani po paguan disa banorë të lindur jashtë vendit për t’u larguar, pjesë e një qëndrimi të ashpër ndaj migracionit.
Ndërsa vendet në të gjithë Evropën po marrin masa të rrepta ndaj imigracionit, Suedia ka bërë një nga kthesat më drastike.
Ajo pranoi 163,000 azilkërkues në vitin 2015 – numri i dytë më i lartë në Evropë. Deri në vitin 2025, ky numër kishte rënë me 96%.
Që nga fillimi i vitit 2026, qeveria e koalicionit suedez, e cila mori pushtetin në vitin 2022 me premtimin për të ulur imigracionin dhe krimin, u ka ofruar atyre me leje qëndrimi nga jashtë Bashkimit Evropian deri në 350,000 kurona suedeze (37,000 dollarë) nëse largohen nga vendi, ka raportuar Reuters.
Skema po vëzhgohet nga afër jashtë vendit dhe mbështetet fuqimisht nga Demokratët e Suedisë , një parti e ekstremit të djathtë që është jashtë qeverisë, por e mbështet atë në parlament.
“A ju mungon Mogadishu? Granti për riemigrim do t’ju ndihmojë të ktheheni në shtëpi”, thuhet në një reklamë, të paguar nga Demokratët e Suedisë në një autobus dhe që synonte emigrantët somalezë. Partia e ekstremit të djathtë i lançoi reklamat në korrik në transportin publik dhe në zonat me numër të lartë emigrantësh, ndërsa filloi fushata për zgjedhjet.
“Përmirësimi i ri-migrimit është një nga prioritetet kryesore të qeverisë sime”, tha kryeministri Ulf Kristersson. Skema ka një buxhet prej 1.3 miliardë kronash suedeze.
Deri më tani këtë vit, 171 persona kanë pranuar ofertën e parave të gatshme për t’u larguar.
Demokratët e Suedisë duan ta zgjerojnë ofertën edhe për emigrantët me shtetësi suedeze, nëse ata bien dakord ta revokojnë atë.
