Presidenti amerikan, Donald Trump, është takuar me presidentin kinez, Xi Jinping, menjëherë pas takimit të tij me presidentin rus, Vladimir Putin, në kuadër të samitit rajonal të APEC-ut.
Në nisje të takimit, Trump theksoi interesin e përbashkët të SHBA-së dhe Kinës për të garantuar qarkullimin e energjisë përmes Ngushticës së Hormuzit.
“Si Shtetet e Bashkuara, ashtu edhe Kina kanë interes që të sigurohet qarkullimi i energjisë përmes Ngushticës së Hormuzit”, tha Trump, i ulur përballë Xi Jinpingut.
Ai gjithashtu u shpreh se të dyja palët ndajnë qëndrimin se Irani nuk duhet të zotërojë armë bërthamore.
“Irani nuk mund të ketë armë bërthamore, dhe ne të dy e ndiejmë këtë shumë fuqishëm”, deklaroi presidenti amerikan.
Duke folur për luftën në Ukrainë, Trump tha se të dyja palët po shqyrtojnë mundësitë për të kontribuar në përfundimin e konfliktit mes Rusisë dhe Ukrainës.
“Ne po shqyrtojmë mundësinë që të dyja palët të ndihmojnë lidhur me luftën mes Rusisë dhe Ukrainës”, shtoi ai.
Trump u shpreh gjithashtu optimist për mundësinë e një takimi të suksesshëm trepalësh me Xi Jinpingun dhe Vladimir Putinin, që pritet të zhvillohet më vonë gjatë ditës.
“Besoj se ndoshta do të kemi një takim të suksesshëm”, tha ai, duke iu referuar takimit të ardhshëm.
Presidenti amerikan vlerësoi marrëveshjet e arritura mes dy vendeve dhe shprehu bindjen se marrëdhëniet do të mbeten të qëndrueshme për sa kohë të dy liderët janë në krye të shteteve të tyre.
“Besoj se për sa kohë që ti dhe unë jemi në krye të gjërave, nuk do të kemi kurrë probleme”, tha Trump.
Ai shtoi se pret përparim në përpjekjet për t’i dhënë fund luftës në Ukrainë gjatë takimit të planifikuar me Xi dhe Putinin.
