Një vrasje e rëndë ka ndodhur sonte në Vitomiricë të Pejës, ku një grua ka humbur jetën në rrethana tragjike.
Sipas dyshimeve fillestare, viktima është privuar nga jeta me sëpatë nga kunati i saj.
Lidhur me rastin, për median ka folur zëdhënësi i Prokurorisë së Pejës, Shkodran Nikçi, i cili ka konfirmuar se në vendin e ngjarjes kanë dalë njësitë përkatëse të Policisë së Kosovës, si dhe kryeprokurorja dhe prokurorja e Krimeve të Rënda.
“Ka ndodhur një vrasje, ndërsa në vendin e ngjarjes kanë dalë zyrtarë të Policisë së Kosovës, me të gjitha njësitë relevante, si dhe kryeprokurorja dhe prokurorja e Krimeve të Rënda”, ka deklaruar Nikçi.
Rrethanat e plota të kësaj ngjarjeje tragjike pritet të bëhen të ditura pas hetimeve nga organet kompetente.
