Presidenti i Serbisë, Aleksandar Vuçiq, e ka shfrytëzuar fjalimin e tij në Asamblenë e Përgjithshme të Kombeve të Bashkuara për t’iu rikthyer luftës së Kosovës dhe ndërhyrjes së NATO-s më 1999.
Në qendër të deklaratave të tij ishte pretendimi se “katastrofa humanitare nuk ndodhi” në Kosovë dhe se ndërhyrja e NATO-s ishte e pajustifikuar. Vuçiq deklaroi gjithashtu në OKB se asnjë ushtar apo polic serb nuk kishte hyrë në territorin e ndonjë shteti tjetër.
“Asnjë ushtar i vetëm, asnjë polic nga Serbia nuk kishte shkelur në territorin e ndonjë vendi tjetër”, tha ai. Në fjalimin e tij, Vuçiq kritikoi edhe faktin se bombardimet e NATO-s në mars të vitit 1999 nuk ishin autorizuar paraprakisht me një rezolutë të posaçme të Këshillit të Sigurimit të OKB-së.
Opinionisti Gani Mehmeti ka reaguar ndaj deklaratës së presidentit serb, Aleksandar Vuçiq, se në Kosovë nuk kishte ndodhur katastrofë humanitare, duke e cilësuar këtë pretendim si mohim të realitetit të luftës dhe krimeve ndaj shqiptarëve të Kosovës.
Mehmeti shprehet se nuk e habit deklarata e Vuçiqit, por mënyra se si ende mund të ketë njerëz që u besojnë pretendimeve të tij. Sipas tij, presidenti serb po mohon dëshmitë e atyre që e kanë përjetuar drejtpërdrejt luftën në Kosovë, si dhe dokumentacionin e organizatave ndërkombëtare.
“Për Vuçiqin nuk do të ishte katastrofë humanitare, sikur të vriteshin të gjithë shqiptarët e Republikës së Kosovës, prandaj ai nuk e pranon katastrofën humanitare në Kosovë. Nuk çuditem nga fjalët e tij, çuditem nga ata që i besojnë fjalës së tij, nëse dikush i beson ende”, ka deklaruar Mehmeti për “Bota sot”.
Opinionisti Gani Mehmeti
Ai thekson se, gjatë viteve 1998 dhe 1999, institucionet dhe organizatat ndërkombëtare kishin mundësi të shihnin nga afër pasojat e luftës në Kosovë dhe se dëshmitë për dëbimet, vrasjet dhe shkatërrimet ishin të shumta.
Sipas tij, veçanërisht pas fillimit të bombardimeve të NATO-s më 24 mars 1999, forcat serbe dhe formacionet paraushtarake intensifikuan sulmet ndaj popullsisë civile shqiptare.
“Me fillimin e bombardimeve të caqeve ushtarake e policore serbe nga NATO, ushtarë e paraushtarakë serbë, në shenjë hakmarrjeje, u vërsulën mbi popullatën e pafajshme shqiptare dhe po shkaktonin gjenocid, duke ndjekur shtëpi për shtëpi shqiptarët nga shtëpitë e tyre. Ata që nuk po i lëshonin shtëpitë e tyre, po i vrisnin. Shtëpi dhe objekte tjera banimi dhe ekonomike, po i digjnin pa hezitim”, ka shkruar ai.
Mehmeti përmend edhe vrasjet e civilëve gjatë dëbimit të popullsisë, duke thënë se shqiptarët që largoheshin nga shtëpitë e tyre ishin përballur me dhunë edhe gjatë lëvizjes drejt zonave malore apo kufijve të Kosovës.
“Dhe, jo vetëm kaq, por edhe në kolona, duke ikur për në male e kah mundnin, serbët shkaktuan masakra të shumta kudo që deshën. Për këtë flasin shumë, me qindra masakra, nisur me familjen e komandantit legjendar Adem Jashari në vitin 1998 e më pastaj gjatë gjithë kohës së bombardimeve të NATO-s, nga 24 marsi e deri më 20 qershor 1999”, shprehet Mehmeti.
Ai e lidh përmasën e katastrofës humanitare edhe me zhvendosjen masive të popullsisë shqiptare, duke theksuar se një pjesë e madhe e banorëve të Kosovës u detyruan të largoheshin jashtë vendit, ndërsa pjesa tjetër kërkoi strehim në zona malore.
“Si nuk kishte katastrofë humanitare, kur rreth gjysma e popullit shqiptar ishte ndjekur për në Shqipëri, Maqedoni e Mal të Zi, ndërsa gjysma tjetër e popullsisë shqiptare e Kosovës ishte detyruar të merrte malet e bjeshkët me pleq, plaka, fëmijë e të sëmurë?”, ka shkruar ai.
Sipas Mehmetit, kushtet në të cilat u gjendën të zhvendosurit brenda Kosovës ishin jashtëzakonisht të vështira, ndërsa mungesa e ushqimit, ilaçeve, mjekëve dhe strehimit rëndoi edhe më shumë gjendjen e popullsisë civile.
Ai përmend edhe numrin e madh të viktimave shqiptare gjatë luftës, duke theksuar se në mesin e të vrarëve kishte njerëz të moshave të ndryshme, përfshirë të moshuar dhe fëmijë.
“Ku nga shqiptarët mbetën rreth 13 mijë të vrarë prej serbëve, në mesin e të cilëve kishte edhe pleq 90-vjeçarë e deri në fëmijë të posalindur, të cilët assesi nuk kishin mundur të ishin pjesëtarë të Ushtrisë Çlirimtare të Kosovës, por vetëm pse ishin shqiptarë, serbët po shfrynin urrejtjen e tyre mbi ta”, ka deklaruar Mehmeti.
Në fund, opinionisti e ashpërson kritikën ndaj Vuçiqit, duke thënë se mohimi i katastrofës humanitare në Kosovë, sipas tij, lidhet me qëndrimin e presidentit serb ndaj shqiptarëve.
“Pra, e them me plot gojën se, për Vuçiqin nuk do të quhej katastrofë humanitare edhe sikur të mos mbetej asnjë shqiptar i gjallë në Kosovë. Kjo vjen si rrjedhojë e urrejtjes aq të madhe të tij ndaj shqiptarëve”, përfundon Mehmeti.
